مقالات
بصراحه .. متى يقال وزير النقل ؟! هل هناك كارثه أكبر !المسئوليه فى حادثه ورد الجناين مسئوليه من !!
أنا شفت حضرتك بتقيل الناس ع الهوا .. جربت تقيل نفسك قبل كده ؟؟ .. جرب وهتنفع. .. ومش لوحدك المسئوليه تقع على جميع المسئولين ؟!
سمير المسلمانى
المسئوليه فى حادثه ورد الجناين مسئوليه من !!
فكرونى بشباب ورد الجنانين 25 يناير مع الفرق وان كان الاثنين فى مركب واحد شباب انتفض من اجل مصر وبنات فى عمر الزهور قدرهم يشتغلوا من الفجريه علشان لقمه العيش ويساعدوا اهاليهم .
مسئوليه من ماحدث !!
مندهش من عدم تسمية الأمور بمسمياتها بعد (مصيبة) زي مصرع 18 مراهقة وشابة بيجروا ورا لقمة عيشهم، ومنهم اللي دخلت هندسة لكن العين بصيرة والإيد قصيرة، وكلهم راحوا مع سواق الميكروباص بتاعهم ف حادثه على طريق المفروض يكون خلص من سنين وسط فشخرة وزير النقل المعتادة بالمنظومة بتاعته في لقاءاته، وصوته العالي الجهوري، وتحليلاته اللوذعية، وتصريحاته الغريبة ف بعض الأحيان.
باستعجب من ناس سابت المصيبة ومسكت في كلام قاله عمرو أديب وهو المذيع الوحيد اللي راح شايل كفنه على إيده وحاول يحط المسئولية ف إيد المسئول الحقيقي عنها بغض النظر عن العواقب وهو عمال يقول : ولو آخر حلقة هعملها.
باستعجب من عدم وجود توك شو قوي على قنوات المتحدة يوم الجمعة، ومذيع حقيقي يتكلم بلسان الناس ويحكي وجعهم، وكإن يوم الجمعة أجازة من الأحداث، بس طبعًا ربنا يوفقهم هيجيبوا رضوى الشربيني ف برايم تايم بعد ما كانت في سي بي سي سفرة عشان يعملوا طفرة إعلامية.. عفارم يا أساتذة.
باستعجب من إن فكرة (نقد الحكومة) غابت عن الإعلام، مع خوف شديد من نقد كامل الوزير وكإنه محصن مثلًا أو ملاك بجناجات لا يخطئ ولا يراجعه أحد، بل ويطرحه البعض كرئيس وزراء قادم، وعارف كويس أوي طريقة كامل الوزير بإنه يسيب الدنيا تهدا وبعدين ينزل يزور بقى أسر الضحايا ويقدم واجب العزاء بنفسه قال يعني كده الراجل ذوق ذوق ذوق الصراحة. لكن هل سيحاسب؟ هل لدى مجلس النواب قوة وجرأة محاسبته بما يليق بجلال حادثة ؟ مش عارف ..
– هيطلع ويقول : الحوادث في العالم كله. هقوله اخرس
– اخرس يا أي حد هيطلع ويقول : الحادثة ما تخليناش ننسى التقدم العظيم والطفرة اللي بنشوفها في قطاع الطرق
– اخرس يا أي حد هيطلع يقول : ربنا يرحمهم طبعًا بس الحوادث قلت عن زمان وبتقل كل سنة اهه !!!!
– اخرس يا أي حد هيطلع يقول : الراجل ده مستهدف من الجماعات والإعلام المضلل والمنتفعين وهو قدم كتير لمصر.
وفي نفس الوقت ..
خالص حسرتي، لعلمي ويقيني، إن للأسف الشديد الحادثة دي زي غيرها في قوانين التريندات المصرية والسوشيال ميديا التي تحكم في غياب الإعلام الحقيقي : تاخدلها يومين وتخلص ونشد الفيشة بتاعتها.
وخالص رجائي بأن يكون هناك مشروع حقيقي يحمي عمال اليومية والعمالة غير المنتظمة في مصر ويوفر لهم كرامة في بلدهم، ولتقم كل وزارة بمسئوليتها في التخطيط لبكره وليس لرد الفعل .
البقاء لله يا أهالينا في المنوفية ..
ورسالة لمعالي الوزير كامل الوزير :
في الإدارة فيه حاجة اسمها إدارة أزمات، وهو علم مش عفيجة، وأول خطوة فيه توقع الأزمة قبل حدوثها، فلما يكون عندك طرق اسمها طرق موت، وماخلصتش، ومتعطلة. روح خلصها الأول بدل ما تسيبها فردة واحدة والناس ماشية فيها عكس بدون رقابة..
وبالمناسبة:
أنا شفت حضرتك بتقيل الناس ع الهوا .. جربت تقيل نفسك قبل كده ؟؟ .. جرب وهتنفع.
